隨著家長對扁頭綜合症意識的提高，更多父母開始注意到寶寶有扁頭的情況。受訪醫生表示，扁頭情況多數屬於輕微水平，可通過改變睡姿等來矯正，情況較為嚴重的則建議接受治療。
劉思婷的六個月大寶寶有扁頭綜合症，經醫生評估情況屬於4.5級，接近第五級的最嚴重水平。她下週將開始頭盔治療。
劉思婷話：「3000蚊真係幾貴，但係見到醫生嘅時候佢哋講幾嚴重。佢耳朵一個係喺前面一個喺後面，所以諗緊以後要着眼鏡點算。就噉我哋先算啦就唔理嗰個費用。」
國大醫院邱德拔 – 國立大學兒童醫療中心小兒神經內科高級顧問醫生王思佳醫生表示：「戴咗（頭盔）之後係保持佢嗰個頭嘅形狀，顱骨嘅形狀。呢個治療其實亦相當長，至少有時三個月以上，而且一日要戴23個鐘，只可以拎出一個鐘畀寶寶沖涼。頭盔嘅上面其實有個洞，所以比較通風。」
魏葛蕙嘅14個月大寶寶接受頭盔治療已經有七個多月，預計18個月大時可以結束治療。佢係喺寶寶三個月大嗰陣發現佢有扁頭。
魏葛蕙話：「佢就比較偏鍾意瞓一邊啫，然後就改正佢嘅時候，佢就有啲唔鍾意。久而久之就越嚟越扁。」
兒科矯形診所義肢矯形師麥嘉穎表示：「黃金（治療）嘅時間大概係四至八個月大左右。改正嘅原理就係話頭盔係對稱嘅，頭係唔對稱嘅。嗰個小朋友趁住佢生長嘅時間，就將嗰啲虛位畀填滿咗，就可以將嗰個形狀畀矯正過嚟。」