黎芷珊代家人公佈，資深演員許紹雄今日凌晨約02:30，因癌症引發器官多重機能衰竭安詳離世，離世時獲家人以及朋友陪伴，家人非常感謝近日朋友紛紛探望，亦有唔少朋友因身外地或未能現身而電話慰問，非常感激外界關心，後事將待家人再作公佈。資深演員許紹雄於10月26號驚傳病危入院，令外界非常憂心，唔少圈中人陸續趕抵養和醫院見最後一面。許紹雄出身顯赫卻低調入行，從未靠家族光環，憑實力踏上演藝路，亦因當年佢係香港第一個駕駛名車（Mercedes-Benz）返工嘅藝員，故得「Benz雄」稱號。
許紹雄喺今年6月帶女兒許惠菁回廣州舊居「許地」打卡，當時有網民留意到他行平路時頻頻喘氣，非常擔心其健康狀況。許紹雄最後一次公開露面係喺今年中秋節10月6號時，同女兒及一班老友羅樂琳等聚餐，大合照上許紹雄顯得悠然自得，完全沒有異樣。