《呂濤米Lo花Son Show》播出最後一集，終於論到姜濤。
佢哋在一間粉麵店一邊食宵夜一邊談心，表示入行前成日着拖鞋去小店食嘢，不過入行後就好少去。二人開始傾計時，姜濤主動講到王晶喺網上無故攻擊佢︰「不如講下刺激嘢，對於王生（王晶）最近言論，你點睇？」，嬲到爆嘅花姐就話︰「當日睇到新聞，我即刻同同事Mary講，我而家好想出story」，姜濤就問講咩，之後花姐就話︰「我要點點點話佢，後來Mary㩒住，叫我唔好咁激動！但你覺唔覺你永遠好惹呢啲？」無奈嘅姜濤表示︰「我乜都冇做，連story同IG都好少更新出post，都無啦啦畀人咁樣。」
花姐就問姜濤有冇因為咁好大壓力，姜濤坦言唔會，但心有唔舒服，當換角度諗當佢為自己好，不過佢唔明點解成日都係佢中槍，點解要揀佢。而花姐就直言︰「你要接受可能你係知名度最高嗰個 ！」有少少唔不服嘅姜濤就話︰「但每一次都鬧到我上熱搜。」心痛佢嘅花姐就表示自己都有唔開心並話︰「永遠好嘅就唔講，唔好嘅就畀人話，我好嬲，直情已將story內容都打埋出嚟…」姜濤唯有勸籲佢︰「唔好咁衝動，你入行幾多年呀，仲唔冷靜過我嘅！」
問到點處理壓力嘅時候，姜濤就話︰「我好中二病，記低佢，希望有一日可以證明返畀佢睇。不過好多時話放低呢啲人哋意見，又或者話無視，真係唔係咁易做到。永遠都有新嘅嘢，你放低呢下，但唔係下下都放得低，我哋又唔係和尚。換轉以前嘅我，可能我都想出story。不過可能因為經歷得多咗，就明白點樣處理。」